謝雪心獻唱名曲念恩師 慈善騷為博愛醫院籌款

謝雪心 出席博愛醫院記招，宣布將於11月初舉行慈善演唱會，為博愛醫院籌款。今年適逢任姐任劍輝逝世三十五周年，身為任姐同白雪仙入室弟子嘅心姐，希望憑歌寄意，表達對恩師懷念，與任姐嘅戲迷同歌迷一齊重溫經典名曲。

多年力致力行善嘅心姐，不時參與探訪活動，佢話「喺探訪過程中，令我深刻體會到『施比受更為有福』，見到一張張嘅笑臉，更加堅定咗我走上慈善之路嘅決心。」 今次跟心姐合作嘅團隊大多為年青人，團隊希望喺今次演唱會為觀眾帶嚟耳目一新嘅舞台效果，當中包括多媒體舞台設計同創新元素，同時結合耳熟能詳嘅戲曲，觀眾將會享受到一場驚喜嘅視聽盛宴。