吳浩康公開演唱認經濟狀況改善 張致恆再上網求助允轉介工作

吳浩康 Kiri T 日前出席出席港鐵45周年嘉年華，現場獻唱多首歌曲炒熱氣氛，眼見唔少家長都帶子女到場，Deep亦指想帶愛子參與，不過因太太已安排其他活動作罷：「而家工作可以自己就時間，所以平日有時間都帶小朋友去玩，反而星期六、日忙教會服務，10月仲會參加佈道會。」

阿Deep努力為家人工作，成為真男人典範
Deep又話平時開工都會同唔少香港人一樣搭港鐵，不過因為乘客忙返工未瞓醒而冇人要求合照。提到早前遠赴澳洲街頭表演，佢又表示算係為移居港人解「思鄉情」：「其實我係去佈道會同傳教，同當地朋友傾開知道大家都思鄉，所以即席街頭表演比大家開心吓！有啲人話我『唔係冇錢咩？點解咁有錢飛去澳洲做Busking？』，其實係誤會，機票係人哋買比我嘅，我都坦白講，其實經濟狀況同工作狀況都已經改善好多，多謝大家關心！艱難時期同大家分享，而家好啲都會同大家講。」
近年投入建造業嘅佢，又話經濟情況已有改善

佢又指近期社會經濟差，唔少建築工友都開工不足，而 張致恒 都係受影響嘅其中一人，而對方再度於網上開口求助，Deep就指兩人未有提及呢個話題：「我同Steven都係男人，關係同友情一般都係對方有需要先開口，我就睇點配合。（會唔會介紹佢開工？）如果客人有興趣，我都會介紹比佢。」 
同樣成為建造工友嘅Steven，近日又網上公開求借錢

同場的Kiri T就指希望完成演出好好參觀嘉年華：「我想快啲做完嘢出去玩攤位，平時我去錄音室都會坐港鐵出入，但冇化妝就會撞到Fans，喺我最冇打扮嘅時候見面！」演唱會舉行在即嘅佢又大嘆無法加場，希望有機會喺更大場地演出：「我會邀請一齊做音樂的朋友做嘉賓，仲有啲我幫佢作過歌嘅歌手一齊玩，所以大家期待吓！」

Kiri T期望可以於更大場地開個人騷