黃淑儀醫生老公徐景清罕有露面 陪愛妻去南疆旅行慶祝生日

黃淑儀與徐景清結婚逾40年一直恩愛如昔，長居加拿大，閒時結伴返港探老友，10月10號係淑儀姐75歲生日，一眾好友提前為佢慶祝，噚日資深傳媒人汪曼玲喺社交平台貼出多張合照，見席上有陳松伶、著名攝影家梁海平、連炎輝等。

淑儀姐獲好友送圍巾作生日禮物，好友又為佢設宴準備魚翅、花膠海參鮑魚、靚杉斑及壽桃包等，可見淑儀姐人緣確係非常好，醫生老公徐景清罕有現身，原來佢今次專程返港，係為咗淑儀姐嘅生日旅行，佢哋準備去南疆遊覧，而每年10月就係南疆最佳旅遊時間。

黃淑儀同徐景清移民加拿大，徐景清為溫哥華著名腦專科醫生，徐景清生活非常低調，甚少公開露面，只間中陪愛妻黃淑儀現身朋友聚會，黃淑儀有過兩段婚姻，曾與年長廿歲嘅導演劉芳剛閃婚，育有一仔一女，婚姻只維持8年，之後黃淑儀喺朋友婚禮認識現任老公徐景清，黃淑儀於1981年再婚，育有兩子徐肇麟與徐肇平，而徐景清對繼仔繼女亦愛惜有加。