67歲林嘉華銀髮Look精神爽利 拍劇直播帶貨忙不停

林嘉華自2019年與TVB約滿便返加拿大定居，與太太劉寶珍好好享受生活，雖然佢返咗加國，仍有不少影視作品邀約，之前因疫情及照顧年邁嘅父母，嘉華哥有3年幾時間未返港，未能參與幕前演出，67歲嘉華哥今年不時返港拍劇開工，過足戲癮！

嘉華哥一向人緣極好，閒時與好友相聚，早前驚喜現身錢小豪嘅直播節目，噚日陸詩韻喺社交平台貼出嘉華哥同黃長興嘅三人合照，似係一齊做直播帶貨！嘉華哥除咗參與直播帶貨，今年仲過足戲癮，3月拍網劇《執法者們》、10月初去台山為內地刑偵劇開工，同張家輝、張兆輝及胡杏兒合作，忙完一輪工作再次露面，一頭銀髮嘅嘉華哥仍精神爽利，身型依舊Fit爆。

嘉華哥閒時與太太四出遊玩，享受半退休生活，喺社交平台不時見到佢哋甜蜜嘅足跡，而嘉華哥一向投資有道早已上岸，早前豪花900萬港元喺加拿大買3房湖邊度假屋，又計劃喺另一區買多一間供釣魚之樂。