歡樂今宵丨歷代主持聯同台前幕後200人歡聚 阿叻親解與明星足球隊傳不和

只要唱出頭兩句「日頭猛做，到依家輕鬆吓」，相信有唔少三、四十歲以上嘅人會接住唱埋「食過晚飯，要休息返一陣，大家暢聚，無綫有好節目，歡歡樂樂，笑笑談談，我哋齊齊陪伴你」，呢首屬於香港人集體回憶嘅晚安歌。

11月4號晚喺阿姐汪明荃帶領下又再唱起，因為一眾TVB台前幕後超過二百人聚首一堂出席「EYT好友聯歡晚宴」，當中包括歷代EYT主持包括汪明荃、盧海鵬、吳麗珠、石修、陳百祥夫婦、彭建新、李龍基、潘芳芳、黃淑儀、林嘉華、劉曉彤、張鳳妮、余慕蓮同丁羽，仲有前EYT監製吳雨同開創人蔡和平。

吳雨話聚會一年一度盛事，見到現場坐滿一班舊同事，吳雨覺得盡現「EYT精神」，鄧英敏話多得吳雨號召大家先成事，而魏綺清更專登改機票出席盛會。張鳳妮話相隔廿幾年再次參與聚會，規模比以前大好多，亦勾起好多EYT嘅回憶。余慕蓮精神奕奕現身當中，佢話好開心見到好多好朋友。

叻哥早前有傳佢同明星足球隊及好友不和，呢日佢亦有解畫，李龍基啱啱慶祝完74歲生日，佢話正日生日就相約朋友食飯，着到靚一靚去探望獄中嘅未婚妻王青霞。