黄劍文重回澳洲百感交雜 提早送聖誕禮物予當地家人

黃劍文開完佢首個演唱會後，就飛咗去澳洲三個星期，呢日佢終於返嚟香港，獲大批fans到機場接機，呢次Kimman喺當地留咗咁耐，係因為要出席當地舉行嘅佈道會兼探訪老人院。

曾經喺12年前去過澳洲working holiday嘅Kimman，再次重返當地心情都百感交雜，仲話多年後再喺熟悉嘅街道上行走，有種感動湧上心頭，仲爭啲喺朋友面前忍唔住喊。

呢次嘅澳洲之行，Kimman都有申請街頭busking，但因為冇帶樂器隨行嘅關係，Kimman要喺當地臨時添置，不過本來Kimman想搵返當年買樂器嘅店舖，但搵咗好耐都搵唔返。至於今次嘅busking，Kimman就笑言重演咗自己當年喺當地busking嘅感覺，再次感受到自己當年為夢想可以有幾瘋狂呀！

下月就係普天同慶嘅聖誕節，Kimman就表示有趁機喺當地搜羅聖誕禮物畀當地嘅家人，由於同家人有8年冇見面，所以Kimman就打算買貴少少嘅禮物，但就畀家人心疼佢使太多錢喇。