串流平台新加坡公佈大批新作 金秀賢狂啖南洋美食逐樣數

有串流平台於新加坡舉行盛大記者會，公佈將會播出嘅新作，包括10部將會播出嘅重磅韓劇，唔少有份參演嘅韓流巨星都飛到當地宣傳，其中就包括 金秀賢 曹寶兒 嘅《山寨人生》、 金憓秀 鄭星一 嘅《揭密最前線》、薛景求 朴恩斌 嘅《狂醫魔徒》金多美 孫錫久嘅《血謎拼圖》柳承龍 林秀晶 嘅《下流大盜》等新作喇。

玄彬 同近日捲入桃色新聞風波嘅 鄭雨盛 一樣有新作推出， 全智賢 亦會演出新劇，當年佢同金秀賢合作《來自星星的你》全球火紅，來年各自推出新作相信又會掀起熱潮喇。

全智賢雖然未有現身，不過就一樣宣佈有新劇會推出
近日陷入劈腿風波嘅鄭雨盛將同玄彬合演新作

金秀賢於新劇中扮演一名挑通眼眉嘅生意人，而今次到訪獅城，就連一向非常自律嘅佢都難頂南洋風味，提早抵埗破戒大啖各式唔同美食，仲如數家珍逐一細數，仲搞笑話完成宣傳後要食乜係自己最苦惱嘅問題。
金秀賢此行提早到埗，仲提到不停狂擦當地美食

而金憓秀就以低胸裝大顯成熟韻味，今次新作佢將扮演一名節目組長，同組員一齊發揮傳媒公義，更加要上陣應付唔同動作場面，落力拍攝嘅佢仲搞到大腿肌腱撕裂，認真敬業呀。
金憓秀性感打扮出現，原來新劇拍攝時大腿曾嚴重受傷

而新一任美國隊長Anthony Mackie亦都飛到當地宣傳，佢仲分享扮演飛隼同美國隊長嘅分別，又話一身裝備對佢非常重要，更對擁有全新戰衣非常興奮呀。

Anthony Mackie就分享拍攝超英新作嘅心情