《焚城》上畫一個月票房突破3500萬 四大感人催淚場口花絮曝光

由劉德華、莫文蔚等主演嘅大型災難片《焚城》上畫一個月，票房突破3500萬，並且持續累積中。片中除咗大型災難場面令人驚心動魄，亦有唔少感動位，最新釋出嘅拍攝花絮就包括幾大催淚場口。

謝君豪戲中飾演經驗老到消防員「煙鏟」。
謝君豪戲中飾演經驗老到消防員「煙鏟」，魏浚笙則係初出茅廬嘅「細柱」，二人喺戲中嘅關係亦師亦友。結局一幕兩人因行動策略分歧爆發激烈衝突，煙鏟喺憤怒之下連環掌摑細柱，呢場情緒張力極高嘅戲，對演戲經驗尚淺嘅Jeffrey來講好有難度，佢感激影帝豪哥令佢成功入戲，最終場戲拍足四次先收工，豪哥笑言「打到手都痛」，不過佢亦大讚後輩表現。

魏浚笙則係初出茅廬嘅「細柱」。
廖子妤飾演嘅蘇怡同梁仲恆飾演嘅寶明，兩公婆同為消防員，原本準備迎接小生命，無奈寶明為咗拯救手足冒險前往災場，寶明最終順利同蘇怡重逢。呢場夫妻情深嘅戲份拍攝環境極為艱難，足足拍咗六次，廖子妤回憶：「當時風雨好大，啲雨大到連隻眼都睜唔開，但反而呢啲環境幫助我哋演員更加投入角色。

廖子妤飾演嘅蘇怡同梁仲恆飾演嘅寶明，兩公婆同為消防員。
王丹妮作為片中唯一一位前線女消防員，佢飾演嘅Madam Chan同白宇飾演嘅黎杰峰有情感線。當中一場黎杰峰向Madam Chan深情下跪，再用木製戒指求婚，成為全片最浪漫嘅場景。Louise形容當時情況：「白宇嘅眼神非常深情，動作亦好體貼，嗰種浪漫完全令我冧豬。」木戒指嘅設計亦令Louise感受到導演嘅細膩心思：「導演好犀利，諗到木製嘅戒指，一來於火場內唔會辣親隻手，二來以木比喻連理枝，含有『願為恩愛夫妻』嘅意義，對消防員係另一種浪漫，另一種細心嚟。」另外，何啟華同林家熙呢對好拍檔嘅生死兄弟情同樣賺人熱淚。

王丹妮作為片中唯一一位前線女消防員，佢飾演嘅Madam Chan同白宇飾演嘅黎杰峰有情感線。