鄭雨盛桃色醜聞後首現身 公開道歉希望私事唔好影響電影

第45屆青龍電影獎於日前舉行，多位韓國影星盛裝赴會，包括頒獎禮主持韓志旼同李帝勳，呢次韓志旼係喺前輩金憓秀手上接棒擔任司儀工作，令佢覺得相當榮幸，而李帝勳雖然相當緊張，但訪問時都不忘賣口乖大讚拍檔係咁多女演員當中最靚嘅一位。

另外踏上紅地氈嘅仲有角逐新人獎嘅Yuri、今屆男配角得主丁海寅、角逐女配角獎嘅韓善伙同林智妍。因為劇集《黑暗榮耀》惡女一角而爆紅嘅林智妍，以薄荷綠色晚裝登場，相當耀眼。

紅地氈上仲有角逐影后嘅金高銀同湯唯，拖緊老公金泰勇一齊行紅地氈嘅湯唯，大晒恩愛之餘，仲以三種語言回應司儀提問。影后嘅寶座最終由金高銀以話題驚慄片《破墓》而奪得，而影帝就由黃晸珉以《12.12：首爾之春》三度封帝。不過呢位出爐影帝都唔及影帝候選人鄭雨盛咁搶風頭，佢嘅未婚產子風波同一腳踏三船嘅醜聞下首度現身，事關佢有份主演嘅電影獲得最佳電影、年度票房最高電影獎等大獎，鄭雨盛更喺台上為風波致歉，表示唔希望自己嘅私事成為電影嘅污點。

韓國一個大型音樂頒獎禮亦接住青龍獎舉行，其中人氣女團aespa捧走年度歌曲獎、年度藝人獎、年度專輯獎、最佳女團、最佳演出得多個獎項，成為頒獎禮大贏家，另外獲得最佳男團嘅RIIZE，因為成員洪承翰被粉絲要求退團而引發一輪風波，而家RIIZE能夠得到獎項認同，佢哋上台時都作出多次道歉，同時亦感謝粉絲一直嘅支持。當晚踏上紅地氈嘅仲有16人女團tripleS、歌手李泳知、男團ATEEZ、BOYNEXTDOOR，同埋擔任表演嘉賓嘅日本人氣組合YOASOBI。