容祖兒化身招財貓拍攝新廣告 擺怪趣pose同貓貓同框互動

容祖兒 為連鎖電器舖拍攝最新一輯廣告，化身招財貓，戴住紫色貓耳毛毛帽，著住繽紛紅色毛毛褸，擺出多個搞怪pose，可愛又逗趣。為配合招財貓主題，廣告仲邀請到貓貓明星同Joey同框，拍攝現場無論Joey同工作人員都抵擋唔住貓貓嘅可愛魅力，Joey連休息時間都不停同貓貓玩。

Joey早年曾經養過貓，不過喪貓之後自己已好一段時間冇同貓貓親接接觸，而今次陪同拍攝嘅貓貓零舍乖巧，拍攝空檔任摸任抱唔嬲，搞到Joey都心思思想再成加入貓奴行列，仲同貓主人講，如果屋企有小貓可以通知佢領養。

廣告中嘅姊妹角色就搵咗Joey師妹郭思以及尚未出道嘅創作歌手Hilary Choi演出，場面和睦。而拍攝當日為令拍攝過程更放鬆，Joey仲親身挑選背景音樂，邊跳舞邊擺pose拍攝，令成個拍攝過程非常順利。