麥明詩搞Baby Shower兼慶生 自嘲黃色長裙造型似奶龍

懷孕6個多月嘅 麥明詩 ，大肚婆生活多姿多采，繼日前同家人去峇里Family Trip之後，喺生日前夕佢同老公盛勁為又大搞Baby Shower派對，唔少朋友都有到賀，真係非常熱鬧，而同樣懷有身孕嘅何依婷亦都係座上客之一。

當日身穿鮮黃色貼身長裙嘅Louisa，笑言本來揀咁燦爛嘅顏色，係想寓意寶寶將來成為別人嘅陽光，點知出嚟嘅效果竟然似足奶龍，雖然被嘲喺孕婦時裝災難，但係Louisa一啲都唔介意，呢個孕婦真係好玩得呀。

呢次Baby Shower其實亦係Louisa嘅33歲生日會，佢留言指：「自從6個多月之前，人生再也不只是屬於自己了。不過能健健康康地和這個小生命一起分享歡樂時刻，已經是最好的生日禮物。」呢日唔少朋友仲提供勁有創意嘅BB名，好似「盛夏」、「盛事」、「盛裝」等等，而喺創意角度睇，暫時「盛裝」跑出，不過亦有網民力撐「盛夏」好聽。

呢日準父母雖然未有公開BB性別，不過唔少人就憑相出動偵探頭腦，好似有人指Louisa肚圓圓似係佗女，但亦有眼利嘅網民觀察指，相中賓客都攞住粉藍色同白色奶樽，所以推斷係仔。

不過，正如Louisa之前所講，無論仔定女都一樣咁開心，Louisa仲感觸剖白自己懷孕感受：「從社交媒體上看到好多別人美麗的孕照、對 “Amazing Pregnancy Journey”的感歎… 但 “Amazing” 背後是很多的不安與不適；由fatigue、腸胃不適（原來不止於孕吐），到身形、體重、行動力的變化，到脫髮、波動的情緒，這些都是美麗的孕照上看不到的。有些日子我會覺得自己光芒四射、充滿力量，而有些日子…… 我覺得自己像一粒會行走的M&M。」最後，佢又表示幸運獲家人無盡嘅愛錫同關懷，老公仲每日都讚佢靚呀。