中山美穗於兒子送別下低調火化 中山忍盼大家別忘記姐姐

日本女星中山美穗於6日被發現在家中浴室離世，終年54歲。據中山美穗嘅官方網頁公布，其家人於12日為佢低調舉行喪禮，而與中山美穗已有10年冇見面嘅兒子，亦有嚟送媽媽最後一程。

官方網頁於12日發布中山美穗嘅喪禮詳情，以及其妹妹中山忍嘅感言，當中提到中山美穗已於12日、喺萬里無雲嘅晴朗天氣下，完成火化儀式。葬禮現場以溫柔嘅粉紅、純白、明黃的花朵為主，當中深紅色嘅大麗花裝飾，令人聯想起中山美穗熱情華麗嘅一面；現場擺有其生前嘅作品照，中央則放有中山美穗着住佢最喜歡嘅服飾開心唱歌嘅照片。

整個葬禮只有家人及公司人員出席，其家人及公司都感謝媒體同粉絲，可以畀佢哋喺一個平靜嘅氛圍下送別摯愛。

中山美穗妹妹中山忍亦發表公開信，當中提到告別姐姐嘅心情：「雖然離告別只有短短數天，像回到孩提時代般，排好枕頭，凝望着姐姐的側臉進入夢鄉，這個安穩平靜的時刻是我的寶物。」中山忍又指姐姐一直希望兒子可以幸福快樂，所以當已經10年冇見嘅兒子，嚟到送中山美穗最後一程時，中山忍表示：「希望看到兒子幸福快樂的姐姐，與她心愛的兒子能夠有再會的時間。牽着手並依靠在一起的身影，是非常非常幸福的時刻。」

中山忍指姐姐係個無論發生咩事都有勇氣邁步向進嘅人，自己亦為姐姐感到驕傲，同時佢希望大家唔好忘記姐姐嘅聲音、歌聲同指尖，因為對佢而言，中山美穗唔只係佢嘅姐姐，同時亦係「大家的中山美穗」、「永恆的閃耀之星」。

至於有追思會嘅其他細節，中山美穗嘅公司表示會盡快公佈。