炎明熹宣傳《戀上西沙》現場獻唱 大爆初見李爾晨感覺猥瑣

炎明熹 李爾晨 海俊傑 張美妮 麥玲玲 等﹐呢日齊齊出席音樂特輯《戀上西沙》宣傳活動，吸引大批Gi炎粉逼爆商場，仲有好多人一早就到場霸靚位。

Gigi劇中飾演一個追夢嘅學生，更會同李爾晨上演曖昧情事，Gigi呢日都有分享難忘嘅拍攝片段，佢話同李爾晨初次見面對方就赤裸上身，搞到佢誤以為對方係「猥瑣男」，後尾先知原來有原因，至於係咩原因，大家就要睇劇先知啦！

Gigi呢日亦現場獻唱音樂特輯主題曲《最動人故事》，首歌MV推出後，喺社交平台已經錄得過百萬點擊，反應非常好。

張美妮同麥玲玲喺劇中分別飾演Gigi嘅媽媽同姑媽，佢哋不約而同話拍攝過程好開心，有靚人又有靚景，直頭係賞心悅目。