姜大衛父子檔為陳慧嫻MV演出 John哥笑言做得唔好：鬧佢﹗

陳慧嫻 日前推出全新廣東作品《陪伴》，佢透過歌曲同大家細味人與人之間微妙嘅相處關係，似分享一段交心嘅友誼係點樣煉成嘅故事。

新歌MV由劉偉恒執導同編劇，仲搵嚟姜大衛、舞台劇演員彭杏英、林愷鈴同John哥兒子姜卓文演出。MV講述夫妻一齊走過高低起跌、甜酸苦辣。

現實生活中，John哥同太太李琳琳係圈中模範夫妻，兩人結婚五十年，相依相愛半個世紀，當中經歷唔少考驗，問到John哥感受，佢話：「其實夫妻又好、家庭又好、一家人都好，一定要成日一齊，成日有聯絡，唔好話夫妻，全家感情都會好。互相打個電話：『食咗飯未呀？』、『你今日食乜啊？』已經好開心。」

MV中，姜卓文飾演自己年輕版，對於兒子表現，John哥笑言：「希望導演滿意啦，我冇乜感受。如果佢做得好，OK！做得唔好，鬧佢！哈哈。」