陳展鵬孖妻女一家三口溫馨過聖誕 天王嫂方媛帶兩女遊珠海被讚慳家賢淑

聖誕新年假期展開，各位星級爸媽抽空陪小朋友享受親子樂，陳展鵬、天王嫂方媛及袁偉豪等分別陪自己家人歡度佳節。

其中有網民拍到天王嫂方媛喺冬至時帶住郭富城兩位千金去珠海一個主題樂園玩，一身輕便裝扮嘅方媛單拖帶住兩個囡囡同父母一齊遊樂園，身邊冇帶助手，有網民大讚方媛好慳家，連快速手環都未有購買，以正常通道排隊入場睇表演同玩機動遊戲。

方媛雖然淡妝上陣，但係佢嘅顏值喺人群中依然好容易被捕捉，郭天王兩位千金則眼大大越大越可愛。此行郭富城未有同行一齊家庭樂，相信城城係為咗即將喺27號晚開鑼嘅台北小巨蛋演唱會而閉關，城城一早透露家人將一齊飛去台北睇騷支持，方媛帶完女兒去珠海玩之後，又要飛台北準備會合城城。

陳展鵬愛妻單文柔今日喺社交平台曬出一家三口溫馨合照，透露原本今年聖誕應承咗阿女愛女「小豬比」陳諾瑤（Quinta）去日本滑雪，不過展鵬聖誕要開工，又要預備一月份嘅演唱會，令旅行要延期，本來單文柔想帶阿女出發，但係愛女好孝順，一定要一家人齊齊整整先肯去，單文柔感到內心好窩心：「佢話寧願唔去，咁乖女，點可以令你失望😌，心態可以轉變💝，氣氛可以營造🎠🎄，氛圍感難我唔到🎉🎊，Happy Merry Christmas 🎁🎄。」