夫妻的博弈｜佳節照開工演員自得其樂 高Ling爆炸頭勁誇游游兩櫈DIY變午睡床

新劇《夫妻的博弈》11月中舉行開鏡儀式，有份演出嘅 高海寧 馬國明 郭柏妍 游嘉欣 楊卓娜 何沛珈 李海銅 仲有近期劇接劇嘅 陳曉華 等 近日正於深圳拍攝，佢哋仲不時分享拍攝日常。雖然近日過完冬至又過聖誕，不過身處演藝事業當中嘅台前幕後工作人員，就依然要繼續開工，所以大家都會用盡方法寓工作於娛樂。

好似日前冬至，Rosita就話高Ling為大家安排外賣湯圓過節，楊卓娜仲分享大家於拍攝現場就地取材，以幾張櫈拍埋變臨時床鋪爭取休息嘅難得一見幕後情況。而平安夜雖然大家都仍然要繼續開工，不過幾位靚女就把握拍攝空檔，齊齊擁抱互祝大家節日快樂，開工都一樣咁溫暖。

《夫妻的博弈》再次由 鍾澍佳 主理，故事以高Ling扮演嘅罹癌女主角姜幸如，發現老公同自己唯一閨蜜姦情，仲慘遭兩人下毒手。姜幸如後來竟「死而復生」，仲奇迹地重返五年前。

任職廣告公司高層嘅佢經歷「重啓人生」後，以亮麗外型，加上回到過去而擁有嘅「預知能力」，帶領一眾女同事組成粉紅兵團，創作一個又一個打動人心嘅廣告。