馮允謙（Jay Fung）近年喺聖誕前後均會推出新專輯，送一份聖誕禮物畀自己嘅樂迷，佢現身TVB娛樂新聞台節目《StarTalk》，與主播許文軒談及今次新專輯以唔同情緒為主題，馮允謙話留意到身邊朋友易受問題困擾、承受好多壓力，聽到朋友嘅故事後，馮允謙覺得好內疚，希望憑歌送上安慰，想朋友可以抒發到自己嘅情緒。

馮允謙承認特別偏心《會再見的》呢首歌，足足寫咗6個版本，改咗50次先接受而家呢個版本，佢更分享與爸爸錄音趣事，馮允謙回想細個係同爸爸分隔兩地居住，佢寫咗呢首歌同爸爸一齊唱，完成爸爸嘅歌星夢，馮允謙本來想留多啲airtime畀阿爸去唱，點知錄音嗰陣，馮媽媽聽完不停笑，搞到馮爸爸怯場，馮爸爸緊張到甩拍子，嗰幾句唱咗一粒鐘，馮允謙覺得係一個回憶，至少同爸爸喺音樂上有合作過。

馮允謙今年派台作品有好成績，被指有機會獲男歌手金獎，馮允謙直言恨攞獎，希望報答團隊嘅努力，好想擁有一份肯定，起碼對團隊有一個交代！