李玟50歲生忌二家姐發文訴思念 三姊妹合唱遺作《珍惜今天》上線

1月18號係已故華語天后CoCo 李玟 嘅50歲生忌，CoCo高齡87歲嘅媽咪、大家姐Carol李秋林、二家姐Nancy李思林日前已飛抵台灣，為CoCo嘅紀念雕像揭幕，李媽媽見雕像完美還原CoCo肢體神韻以及舞臺上嘅風采，忍唔住頻頻拭淚，令人鼻酸。

儀式過後，二家姐Nancy喺社交平台發文，再次表達對妹妹嘅思念之情：「妹妹，今天是你的生日。你看，有這麼多人在思念著你…你在我心中永遠是那個天真爛漫、愛笑的小女孩。你要在那變一切安好，我會帶著對你的思念，排除萬難，勇敢向前走，做到你想我做到的人生，走完我們没有一起走完的路。願你在另一個世界，也能感受到大家對你深深的思念和無盡的愛。」

另外，Nancy亦post出CoCo長眠地武漢紀念墓園歌迷自發嘅紀念活動相，見到現場滿滿花束，對應展翅飛翔嘅CoCo雕像，相信喺歌迷心目中，CoCo已經化身天使，喺另一個繽紛世界快樂高飛。

而喺18號夜晚，CoCo嘅官方頻道亦首播CoCo其中一首遺作《珍惜今天》，首歌由CoCo同兩位家姐合唱，MV中三姊妹化身動畫人物，一齊喺樹林中奔跑、喺海中暢泳，同心協力打敗怪獸，對應歌詞「問我們何時再見，聊聊世界所有酸甜，問你會不會很掛念，原來那些從前天天都是永遠…When Will I See You Again」姊妹情深令人動容。