獨家丨蕭正楠以潛水衣抗朱敏瀚45吋胸 二人蝶式激鬥大玩破冰轉身

熱播劇《奔跑吧！勇敢的女人們》每集都有唔同亮點，之前朱敏瀚就預告過自己喺劇中有好吸睛嘅畫面，搞到觀眾每晚都金睛火眼𥄫到實，呢個彩蛋去到劇集尾聲終於曝光，朱仔同蕭正楠喺泳池度鬥到水花四濺，一個就着住密實潛水衣配蛙鞋落水，另一個就晒出最強body谷盡45吋胸肌插水，相信觀眾們都睇到唔眨眼呀！

朱仔指呢場戲講佢哋兩個用蝶泳嚟決鬥，而阿蕭就解釋因為最初喺《奔跑吧！勇敢的女人們》入面，佢哋曾唱過另一套劇集《戀愛自由式》嘅主題曲，所以佢哋先會相約以蝶泳決鬥，朱仔仲笑言自己終於見識到咩叫「破冰轉身」呀！

赤膊上陣嘅朱仔完美展現肌肉型男嘅魅力，未埋位前佢仲不斷加操，務求將啲肌肉谷到漲卜卜展示畀觀眾睇。之前阿蕭就講過企喺赤裸裸嘅朱仔身邊感覺唔多好受，而家睇到畫面就完全明白佢嘅感受喇！唔好睇朱仔騷下肌好似好輕鬆咁，阿蕭爆佢為咗展現呢副完美body，朱仔喺開拍前一日全日都冇食過嘢喇。

咪睇朱仔咁瀟灑咁跳落水就以為佢泳術高超，其實佢一早就將啲游泳技巧還返晒畀老師，而家只可以話死唔去，落到水識呼吸嘅程度呀。

《奔跑吧！勇敢的女人們》結局篇 20:30 翡翠台