胡子彤唱賀歲電影主題曲 古天樂聲演助陣 演員越Rap越起勁

2025農曆新年賀歲電影《臨時決鬥》配合熱血主題，將於1月28號（年廿九）隆重上映，胡子彤為電影主唱主題曲《Pick Me Up》，而多位演員王丹妮、周秀娜、張文傑及陳湛文等一齊Rap歌演繹，古天樂、梁詠琪聲演助陣，最新歌曲MV正式上架。

胡子彤主唱今次電影主題曲表示非常開心有機會演唱同電影有關嘅歌曲，對上一次係唱電影《BABY復仇記》插曲《那時候》，而今次係電影主題曲，加上有其他演員一齊支持及參與：「首歌好輕快，好切合賀歲片檔期畀大家聽。」王丹妮有份參與演唱rap歌部份：「今次人生第一次Rap歌，發覺原來真係要手舞足蹈先會Rap得有力、有feel，所以我自己都好放開咁唱，仲越唱越起勁，希望聽眾都感受到我哋呢首主題曲嘅熱血同力量。」

周秀娜首次去錄音室錄歌：「以往參與電影都只係拍戲部份，今次係難得嘗試機會，始終自己唔係歌手身份，對於唱歌冇太大信心，反而今次可以Rap一、兩句，同戲嘅演員可以一齊去錄音，感覺開心，亦唔太緊張。」張文傑亦獻出第一次電影主題曲Rap歌：「下次可以rap多啲，我可以行歌手路線。第一次入錄音室錄歌，唔覺得緊張，就當電影配音唱出嚟，覺得幾好玩。」