新《武俠》四齣折子戲加料再演出 李龍首參與花足精力排練

投資逾200萬港元，超過150台前幕後精英製作嘅粵劇專場新《武俠》，4場演出日前正式開鑼公演。整晚3小時演出緊湊，四齣折子戲嘅硬橋硬馬武打場面，加上投影布景到燈光安排，令觀眾目不睱給。

今次新《武俠》係彭美施策劃嘅第九齣作品，佢謝幕時感謝觀眾支持之餘，又指會努力改善不足之處，又特別向一眾演員過去幾個月排練接近二十次嘅努力致謝。

首次與彭美施合作嘅李龍、文武生梁兆明、宋洪波及廖國森合演壓軸折子戲《陸遜勇闖八陣圖》，龍哥指團隊非常專業，而今次因為武打動作多，需要花更多時間同魄力，否則稍有閃失觀眾就會察覺到，對佢嚟講係新挑戰。

梁兆明又同與王志良合作《展昭決戰白玉堂》，一出場兩人鬥氣一幕，令戲迷非常肉緊。王志良演出首場後表示好開心可以演出高難度嘅錦毛鼠白玉堂角色，希望繼續可以做得更好，演出成功。

花旦梁非同就偕梁燕飛同曉瑜共演被喻為粵劇版《東方三俠》嘅《劍膽紅袖除奸宦》，大展刀馬旦功架，三位刀馬旦打頭陣出場，戲服令觀眾眼前一亮。近日身體抱恙嘅梁非同，幸未有影響演出。

《虎豹智擒一丈青》繼續由陳紀婷出演扈三娘，加上符樹旺演王英以及莫華敏扮演林沖迫上梁山嘅故事，陳妃婷稱今次武術總監韓師傅加料安排佢同莫華敏、符樹旺有更多埋身對打，加上音樂同擊樂兩位總監彭錦信、高潤權師傅配合，武打更緊湊精彩。