丁文俊年廿九生日提早慶祝 中一生助慶歌迷送「星」賀壽

丁文俊 日前同Fans親友預祝1月28號生日，一班「中一」老友 羅啟豪 涂家堯 顏志恆 魏嘉信 支嚳儀 陳早怡 林鉫徫 仲有演員 徐偉棟 參與齊齊慶祝。Angus即席為大家獻唱好歌，又同幾位歌手老友合唱，答謝「愛丁寶」嘅支持，節目中曾擔任Angus導師嘅 韋綺姍 亦現身派對，向愛徒派利是祝賀。

Angus今年正日生日撞正農曆年廿九，為方便Fans同家人團年，特意將生日會提前舉行。舊年同歌迷冒寒出海慶祝，今年就決定「上岸」，喺一間法國餐廳，邊嘆美食邊演唱。Angus仲笑言既然海、陸派對都試過，明年可能會舉辦空中生日會咁話。

Angus慶幸雖然比賽完結已久，不過「中一生」關係依舊友好，舉行完「中一生」百強聚會，，呢日好友又抽空同佢共度生日，現場仲變成「中一生」迷你演唱會。

一眾愛丁寶亦製作驚喜影片同送上禮物祝賀，唔少Fans亦送上各式各樣美酒，有歌迷仲以「Angus Ting」字為一顆星命名，寓意佢星途燦爛，事業一飛沖天，別具心思。

Angus將推出新歌《人有無數可能》，新歌由李峻一為其度身定造曲詞，仲有昔日曾同佢組成A-dAY出道嘅老拍檔兼金像獎得主戴偉負責編曲，目前歌曲主音部份已錄製完成，Angus期望作品可以盡快面世，等大家透過曲詞了解佢對人生嘅睇法。