李珊珊飽受情緒病折磨近8年 復出開直播不介意展示肥腫身形

1996年港姐冠軍李珊珊喺2017年起飽受情緒病折磨，一直淡出幕前，亦未活躍於社交平台，直至五年前珊珊為精神健康基金會擔任傳晴大使拍攝宣傳片，首次公開患上驚恐症，但未有復出專心養病。珊珊去年10月同幾位藝人成立全新網上頻道，喺1月22號珊珊正式「復出」亮相，同頻道男主持竹節蟲開直播，珊珊身形明顯有啲浮腫，珊珊表示唔介意而家48歲嘅狀況，仲講笑話要睇返佢嘅全盛顏值觀迎重溫昔日片段。

珊珊喺直播中進一步揭露自己嘅病況，坦言而家仲係食緊藥，不過比高峰期藥量經已減咗80%，目前靠20%自己控制，珊珊表示縱使治病過程漫長更有多種不適﹐強調唔會放棄治療嘅重要，佢當年病情曾差啲連基本生活上嘅自理都做唔到，飲杯水都冇力，有兩年時間未查出病因，困擾咗兩年後，確診情緒病後令佢搵番希望。珊珊指康復情況留待醫生評定，希望透露頻道以過來人身份幫助同路人，分享食藥、病情反覆等經驗。

珊珊呢幾年淡出幕前雖然長期在家，但佢冇同時代脫節，透過互聯網收睇唔同嘅時事新聞、睇唔同國家嘅電影同電視節目，更會睇歷史書。被問曾有否諗過退出娛樂圈，珊珊坦言自己18歲入行，無論能力上同學歷上都好難轉行，注定要繼續做落去。