汪明荃年初二屋企團拜大食會 羅家英出動私伙紅酒宴客 吉吉輝智馮盈盈齊聚

新正頭最開心就係一大班人飲飲食食開開心心去長輩家中團拜，好多圈中人相約浩浩蕩蕩前往阿姐汪明荃同羅家英屋企拜年，絕對係過年重點行程。大年初二阿姐屋企就開大食會，最少七、八十人齊齊拜年，聲勢浩大。

當日所有人穿著喜氣洋洋服飾，包括非戲劇製作高級經理何小慧，一眾後輩周吉佩夫婦、譚輝智同一對仔女、關禮傑夫婦同阿女關楓馨、陸浩明（6號）同女朋友陳詩欣、馮盈盈、黃建東等，大家齊齊打邊爐，當然最重要就係逗阿姐封利是啦！

6號喺自己IG出post除咗多謝阿姐同家英哥款待，最特別係見到家英哥攞出私伙紅酒招待大家，呢樽印有家英哥肖像嘅紅酒係家英哥嘅澳洲朋友為佢特別訂造，上面仲印有香港著名粵劇大老倌字樣，絕對係非賣品，唔怪得飲到大家都舔舔脷喇！