StarTalk一氣呵成版丨胡子彤教唆魚旦妹摵古仔面珠墩 周秀娜分享最難拍嘅打戲

今年香港賀歲片檔期百花齊放，呢日 王鎮泉 就邀請到其中一部賀歲片嘅主演 古天樂、周秀娜及胡子彤 嚟到《StarTalk》，講下佢哋呢套以拳擊為主題嘅喜劇。
戲中飾演女拳王嘅周秀娜，為咗要乎合角色設定，特意喺開拍片密集特訓咗個幾月，務求令打拳嘅姿態、小動作等，都似係一個打咗多年嘅泰拳手。而飾演隱世拳王嘅古天樂，表示最難嘅唔係要拍打鬥動作，而係要度對打嘅招數，佢仲話開始拍前一星期先定好啲招式。

自言好為食嘅胡子彤，就話拍呢套戲最難嘅就係要佢戒口，佢指其中一場要赤膊上陣嘅打戲，但自己只得十日時間去keep個身型，所以嗰段時間只好每日食雞胸肉同烚菜，而拍完嗰場打戲後，佢同周秀娜、王丹妮就即刻叫咗個雞煲嚟解饞。

戲中古仔分別要同 伍允龍 及 張文傑German 對打，不過今次佢就話同German對打比較辛苦。首日開工就受傷搞到小腿受縫針嘅娜姐，笑言本來諗住打拳最多都係瘀傷，冇諗過第一日開工就已經要縫針，而嗰場打戲仲要櫈、畫、煎Pan都係用嚟打交嘅道具，難怪娜姐話拍呢場打戲仲辛苦過戴拳套上台打嗰場戲啦。

之前喺《九龍城寨之圍城》入面飾演魚旦妹嘅童星王尹菁，今次喺《臨時決鬥》入面就飾演古仔同GiGi個女，古仔形容對方係一個老人精，成個人都相當通透。戲中有一幕魚旦妹要摵古仔嘅面珠墩，當時魚旦妹就唔敢落手，而身邊嘅胡子彤就不斷「教唆」對手用力啲摵，原因係呢個動作好多人都想對古仔做，但就冇人敢，而家魚旦妹可以攞正牌就當然要盡力啦！