「東張女神」黎寬怡與圈外男友拉埋天窗 設宴連開19圍幸福出嫁

恭喜恭喜！是日旺婚嫁，除咗衛詩雅之外，「東張女神」黎寬怡（貓仔）出嫁喇！貓仔早前宣布「封盤」，同拍拖多年嘅圈外男友阿Sing拉埋天窗，喜訊一出都令大家感到相當驚喜。日前，貓仔更喺社交平台分享婚紗相，並撰文寫：「剛才趕起的Ecard，準備逐步發出。本來真係打算瞞住全世界，但是我知道您們都好愛我，所以最後都係決定講畀大家知啊。」

而喺2月16號呢個好日，一對新人喺7兄弟7姊妹陪伴下選擇喺屋企進行出門、入門，無論係開門利是玩遊戲以及愛的宣言，一律通通做到足。至於下午就喺西環聖堂舉行天主教儀式婚禮，婚禮後喺副堂舉行雞尾酒會，超過300人參加，到咗晚上就會喺港島區一間酒店設宴19圍。