金賽綸父親斥網紅引導網暴 元斌現身靈堂泣不成聲

韓國女演員金賽綸日前被發現於家中離世，終年24歲，金賽綸死訊震驚韓國演藝圈，童星出道嘅佢，2015年同元斌主演電影《大叔》而知名度急升，更同金所炫、金裕貞被稱最強童星組合「三金」，但2022年被爆醉駕自撞變壓器兼涉嫌肇逃而暫停一切演藝活動兼賠償罰款。

金賽綸雖然自行承擔修理變壓器費用、向事故現場受影響商戶賠償，但佢嘅所屬公司亦要同佢解約，並且要求佢賠過億韓元違約金，令佢背負大筆債務。而喺2024年3月，金賽綸突然喺社交平台上傳同金秀賢嘅貼臉照，隨後火速刪除，加上當時金秀賢主演韓劇正喺熱播階段，令外界認為佢動機不單純，疑似想博流量。因此，金賽綸繼醉駕事件後再被網暴鬧爆。 

據韓媒消息，韓國演藝人自殺防治協會理事長權泳燦，同金賽綸嘅爸爸見面後，向媒體透露，金賽綸因為某位網紅嘅影片而備受打擊。有人指出呢位網紅就係前娛樂記者李珍浩，自稱「演藝背後總統」嘅李珍浩長期喺自己嘅影音頻道發表娛圈八卦嘅相關影片，而李珍浩多次就金賽綸醉駕一事發表評論，又批評金賽綸喺反省期間，同朋友慶生聚會，更喺金賽綸被指因生活困難需要喺咖啡店工作時，批評金賽綸只係「做騷」。

 雖然李珍浩已將影片落架，不過權泳燦就話自己已經著手搜集證據，如果金賽綸家人決定對李珍浩提出控告，佢會無償協助金家人。 而喺2015年拍攝《大叔》後就一直休息，鮮少喺公眾露面嘅元斌，日前就同妻子李娜英現身金賽綸靈堂作最後致意，元斌同金賽綸因拍戲而成為忘年之交，所以喺告別式上佢非常傷心，泣不成聲。 

外界將金賽綸之死歸究於「網絡暴力」，亦認為網暴係令一直努力生活嘅金賽綸自殺嘅導火線。有韓國網紅發布關於金賽綸離世消息時亦翻出，有曾經對金賽綸留下銳利惡評嘅人，喺金賽綸死訊報道寫下惋惜留言，令人感到無奈亦諷刺，一切就好似「鱷魚的眼淚」。