車婉婉難忘與馮德倫初合作 自責失魂幾乎害死JW

除咗喺《中年好聲音》嘅舞台見到 車婉婉 之外，近日佢兩部劇集作品同時推出，先係同一班活力新生代演員合作嘅《痞子無間道》，亦有同夥拍實力派演員嘅《太陽星辰》，難怪有網友笑指一個星期見足佢6日喇。

婉婉喺《太陽星辰》中同相識多年嘅 馮德倫 合作，佢話今次兩人終於首度合作感覺好開心，

而2月18號晚播出嘅劇情更令佢非常難忘，佢話：「Stephen飾演嘅陳法醫，捉咗我飾演嘅莊小姐去『野豬之家』，但係拍攝地點好山旮旯，個山洞環境非常發霉，搞到成個人濕晒。好彩Stephen就住，加上各單位手足好愛錫，令拍攝時間盡量快速，效果理想。不過又濕又乾又凍又熱嘅關係，返去咳足一個月，搞好耐都未斷尾。」婉婉笑言應該係吸咗太多霉菌所致。

除咗分享同Stephen嘅難忘首次合作，婉婉又喺社交平台向JW王灝兒道歉，因為佢喺《痞子無間道》中飾演嘅辛媛潔，竟然因為瞓着咗，連要拎去救JW飾演高強嘅一千両黃金都唔見埋，差啲就害死對方，好彩最後佢諗到計仔先成功營救高強脫險咋。