學友入行逾40載千場演唱成就達成 歌曲風靡全球獲封歌神美譽

張學友 近年一直於各地舉行《60+巡迴演唱會》，星期日晚喺在海口完成第218場演出嘅同時，原來亦係學友嘅歌手生涯40年來嘅第1000場個人演唱，成為有史以來首位巡迴演唱會場次突破千場嘅華語歌手。唱片公司管理層亦特別前往海口現場送上禮物，恭賀同見證呢個歷史性時刻。

學友多年來自後舉行10次個人巡迴演唱會，自1987年首輪個人巡演《張學友87演唱會》由香港紅館啟動，到今年嘅《60＋》巡演，累積整整1000場演出，跨越38年時光，足跡亦遍佈亞洲、歐洲、大洋洲及美洲，曾到訪18個國家同地區嘅百多座城市，吸引過千萬觀眾親臨現場欣賞過佢嘅演出。

雖然學友曾多次指唔會以破紀錄作目標，但係就不斷創造紀錄。好似1995年嘅《友學友演唱會》就總計舉辦100場，刷新當時華人歌手舉辦單次演唱會紀錄；2010年《1/2世紀世界巡迴演唱會》一年之內突破200萬現場觀看人數，成為健力士世界紀錄官方認證嘅「12個月內巡演最多觀眾人數」的紀錄；到2016年《A Classic Tour學友經典巡迴演唱會》，前後兩年三個月共舉辦233場，再成為華人歌手單輪巡迴演唱會最高場次紀錄；直到2023年，學友開啟全新《60+巡迴演唱會》，截至海口站已完成218場，有望打破自己創下嘅巡演場次紀錄。

被譽為「歌神」嘅學友，唔止巡演場次破紀錄，亦係全球最具影響力華語歌手之一，早年已曾獲多個獎項嘉獎，好似「美國Billboard音樂頒獎典禮 - 最受歡迎亞洲藝人大獎」(1994年)、「世界音樂大獎（World Music Awards）- 全球最暢銷華人男歌手獎」(1995年、1996年)、「香港十大勁歌金曲獎 – 亞太區最受歡迎香港男歌星」(1994年、1997年、1998年)、 「台灣金曲獎最佳國語男歌手獎」(1998年)，亦曾7次獲國際唱片業協會(IFPI)嘅香港年度冠軍專輯成績。

喺海口舞台上回顧1000場歷程嘅學友話：「1000場對我來講是什麼，就是證明我過去40年，放了超過接近3000個小時在這個舞台上。我相信我對這個舞台有足夠的真誠，也有足夠的愛。謝謝可以讓我一直站在這個舞台上面的每一位歌迷，無論你今天在場或是不在場，我的過去都承載著你們的愛與支持。沒有你們，我無法站在這個舞台上做我自己最喜歡的事情。這40年，這1000場的演唱會，都是不可能實現的。衷心地謝謝你們一直都在我身邊，謝謝！」

學友1984年正式出道，多年來一直同環球系嘅唱片公司合作，今次唱片公司亦精心準備禮物為呢位逾40年嘅夥伴慶祝。一幅3米多嘅手繪畫卷，呈現學友十次演唱會歷程。精心刻畫每一輪巡演嘅舞台設計同經典造型。