江信熹香港辦首個迷你音樂會 逾百Fans偕戰友現身補祝生日

曾參加《亞洲超星團》獲得第4名加入LOONG9；同時身為男團BOYHOOD成員嘅小鮮肉 江信熹 呢日舉行迷你音樂會，呢日活動就非常深情咁向台下Fans感激大家支持，澳門出身嘅佢狂吸過百Fans現身，佢為大家又唱又跳，一展紮實嘅歌舞實力。

而一眾Fans亦趁呢日為佢補祝19號生日，佢亦同大家一齊合照。仲話呢個線下嘅音樂會同大家現場見面覺得非常開心，又希望每一個鍾意佢嘅人都事事順利同身體健康，亦希望事業發展順利。

事後佢受訪時，就再一次感謝Fans支持喇，佢話無論身處任何地方演出，都會見到Fans嘅打氣，加上一直出現嘅唔同應援物，令佢覺得非常溫暖咁話。呢日幾位超星團老友 丁子朗 張鎬濂 區珀豪 方玉亨 黃星綽 都有齊齊現身，仲同佢齊齊上台玩遊戲。

而主角江信熹又預告今年LOONG9同BOYHOOD都分別會推出唔同作品，將會相當忙，更估計快、慢作品相信都會出現咁話。