楊仲恩為友慶生輪流上台高歌 參與《執法者們》扮警隊一哥

近年旅居台灣，不時港台兩邊走嘅資深藝人 楊仲恩 ，早前返港宴請一眾好友，為其中一位好友慶生之餘，亦順道趁新年與摯友共聚。呢晚黃玉郎伉儷、樂易玲、葉子楣、舒雅頌、周美鳳、蘇珊、魏秋樺、吳麗珠同詹秉熙等，仲一齊為好友Jennie慶祝生日。

晚宴現場安排有樂手伴奏，大家亦紛紛上台高歌助興，黃玉郎伉儷恩愛合唱《問誰領風騷》、葉子楣就選唱《堆積情感》、魏秋樺則選擇日文歌曲《任意讓時光消逝》、詹秉熙就獻唱當年佢主演劇集歌《畫出彩虹》、楊仲恩就先同蘇珊合唱《鐵血丹心》，之後又獨唱多首80年代經典廣東歌，彷如重返當年。

楊仲恩早年憑模仿鄭少秋奪得《歡樂今宵》首屆影視紅星模仿大賽冠軍入行，呢晚獻唱《輪流傳》同《倚天屠龍記》繼續秋官上身。同大班朋友聚首一堂，令佢非常開心，佢仲話只要能力許可，會繼續將生活中每份喜悅，化為正能量幫助社會上有需要人士。

佢又提到去年曾舉辦慈善演唱會為癌症基金籌款，今年亦希望再接再厲。楊仲恩話：「疫情期間一直留喺香港，認識到好多新朋友，之後仲有人搵我拍電視劇《執法者們》，我飾演一哥警務處長，3月就會播出，希望大家都會喜歡我嘅演出。」