梁思浩電台開咪狂收各地求助個案 預告謝雪心《靈接觸》分享未曝光「故事」

梁思浩 主持嘅 TVB PLUS 節目《直播靈接觸》大受歡迎，佢分享嘅靈異話題一直有唔少棒場客，村長亦不時喺節目接求助個案解開觀眾嘅心結。

思浩最近更將助人嘅心移師到電台主持全新節目，為聽眾解決疑惑。佢透露電台節目嘅宣傳片一出，一個星期內經已狂收來自英國、美加、澳洲、香港同內地嘅求助個案，相信要慢慢處理。聽眾嘅提問包括點解成世都冇運行，或者生完小朋友後運勢大不如前等，關於人生軌跡嘅疑惑，思浩希望主持節目，可以用娛樂圈超過40年嘅經驗，加上強大嘅師傅團隊，幫助聽眾解困。

村長之前預告呢個星期會請一位圈中人作客《直播靈接觸》，分享拍劇時嘅古怪經歷，呢日村長亦開估嘉賓係心姐謝雪心。心姐星期一就會現身節目，事前仲提醒心姐要準備一啲從未公開嘅故事。眾所周知心姐效力過唔同電視台，相信會有唔少奇遇。而思浩亦好多謝觀眾支持節目令集數不斷添食，佢更大爆節目入圍一個國際性嘅獎項，希望未來有好消息宣布。