Lolly Talk全員參與紅十字會活動 示範心肺復蘇法有板有眼

香港紅十字會 啱啱過去嘅周末舉行一次城市定向活動挑戰，仲邀請女團 Lolly Talk 擔任星級大使，現身啟動禮為參賽者打氣。成員Sinnie(吳倩怡)同Yanny(劉綺婷)去年已曾參加紅十字會活動，呢日佢哋亦於台上分享，又分組大玩遊戲。

分成兩組嘅成員被考驗對緊急救援同備災服務嘅認識，更被要求到即場示範CPR心肺復蘇法，阿Yo(郭曉妍)同Mei Mei(曾美欣)齊齊對病患模型心口按壓，阿Yo仲「扮」做人工呼吸。

佢哋仲專業逐步講解，講到按壓胸口嘅深度時仲幽默笑言：「好似平日Mei Mei着嗰對高踭鞋咁高，哈哈，知唔知幾多呀？無錯係5cm！」最後Lolly Talk又教大家以「腹式呼吸」輕鬆減壓。

啟動禮完成後，Lolly Talk又齊齊參與定向挑戰，信心十足分配Mei Mei同Yanny負責帶路直擊打卡點，同一眾參加者一齊參與挑戰任務！仲準備好簽名毛巾，俾參加者碰運氣。

Lolly Talk事後受訪時，透露最近齊齊做運動：「我哋上次做完運動，個個對腳震到3日行唔到，不過第二日排舞，真係精神好咗好多。」而提到有音樂才子之稱方大同離世消息，一眾成員都表示非常難以置信：「聽到呢個消息嗰陣仲以為係講笑，真係唔敢相信。好多謝佢為香港樂壇付出嘅努力，佢嘅音樂絕對啟發咗好多人，包括好多我哋呢代嘅歌手。」