中年好聲音3｜劉洋獻唱眼濕濕得96分 黃博95分僅敗仍獲選MVP

《中年好聲音3》爭取16強席位嘅PK賽下半場星期日晚播出，呢集更由有音樂情人之稱嘅 鄭 子誠 以靚聲帶領觀眾投入緊張刺激嘅競賽。本輪由劉洋獻唱嘅《一千個傷心的理由》獲得96 分亮麗成績，劉洋亦分享選唱呢首學友名曲，全因一位好哥哥：「第一次聽這個歌，是我一個好哥哥唱，他唱這首歌當時淚流滿面，我也差一點……」同時一直眼濕濕，令人發現佢柔情一面。

周國豐指因為歌曲結構簡單加上歌詞重覆，所以極考唱功：「作為評審最正係我哋好多時睇參賽者表演，會戥佢驚、戥佢擔心，但剛才3分幾鐘對我嚟講，係享受緊一個表演，根本唔覺得比賽緊。」

而海兒就激讚劉洋係「感情與技巧的完美混合體」：「我唔覺得佢係想做一啲技巧出嚟譁眾取寵，或特登咇啲感情出嚟，佢唱咁澎湃嘅歌，我都唔會覺得太多，仲會想聽下一 首、再下一首！」 

而 「女大魔王」黃博獻唱《我的愛》就獲得95分排名第二高，黃博透露選唱此曲係同十多年前一次歌唱比賽有關：「嗰時準備下round唱呢隻歌，結果未唱已被foul。其實係想講曾經有好多遺憾，如果你堅定去愛，一定可以搵返。」黃博錄影前數天更因患感冒失聲，好彩錄影當日回復狀態。

張佳添大讚黃博唱出個人特色，令佢聽到如痴如醉：「音色好靚，開始(都仲)喺度分析，慢慢已經唔記得咗（身為評判），好好聽，我左腦熄咗，唔想分析！」而陳曉東則謂：「聽到無 奈，聽到追尋，又聽到堅持。同埋好揮灑自如，隨時可以轉另一種氣聲，我覺得好好。」

雖然黃博比劉洋低1分，但最終東東仍選佢為本回合MVP，更以「驚喜的存在」形容黃博。 而本集跌入「中年危機區」嘅分別係阮慧珊《留低鎖匙》85分、善玥澄《唯一》87分、陳溢光《活著 VIVA》85分、何平秋《(你沒有)好結果》86分，以及羅逸軒 《仍然是最愛你》86分，最終評審決定淘汰陳溢光同新馬區選手何平秋，事後陳溢光分享感受時不禁落下男兒淚：「我諗我收埋咗(自己)廿年，廿年冇喊過，呢個舞台令我記起最初唱歌係咩樣。」而何平秋就感謝胞弟何平亮一直鼓勵自己追尋歌唱夢，亦感恩歌唱老師爸爸自小教她唱歌。

今季製作組特意製作了名次紀念襟章頒贈予20強參賽者，昨晚一集就分別向第20名嘅李創偉、第19名陳嘉琦、第18名陳溢光以及第17名的何平秋頒發， 別具意義。

《中年好聲音3》逢星期日晚 20:00 翡翠台