許靖韻巡唱佛山站完美落幕 盼今年出新歌返香港開騷

許靖韻 日前喺佛山完成今年巡演首站，Angela喺音樂會大唱多首代表作，又向fans深情剖白，分享呢兩年巡演嘅心路歷程，仲預告已密鑼緊鼓準備新歌，希望今年可以喺香港開Show：「好多年冇喺香港開show，當然好想，因為一路巡演嘅時候見到好多留言，問幾時會有香港站？會唔會有香港場？自己都好希望，亦都一路有同公司溝通，希望今年係會實現到。」

Angela又指呢次佛山站巡唱別具意義，因為整個音樂會就好似精神食糧：「佛山站Show特別不捨，因為呢個巡演好似陪伴咗我都一至兩年，好似係我呢一段時間嘅一個精神食糧。所以每次見到歌迷都係一個期待，好多謝佢哋一路俾呢個期待我，多謝佢哋嘅陪伴。」Angela直言雖然好多人因為佢嘅翻唱作品而認識佢，但佢希望大眾記住「我係歌手許靖韻」。

至於今年工作計劃，Angela透露正製作新歌，目標係突破慘情歌路線，將目標放喺Band sound類型歌曲：「其實我諗五、六年前有出過《琢磨》同埋《被討厭的勇氣》，可能係一啲比較正能量嘅歌，而家仲係製作當中，希望今年可以多啲唔同類型，快歌又得。」佢又提到自己一直有寫歌，希望今年有機會推出至少一首自己寫嘅作品。