謝曉瑩以嶄新角度編寫戲寶 以現代人眼光重新演繹

粵劇花旦 謝曉瑩 下月將參演中短篇劇《小玉恨．轉》以及聊齋系列《連城》兩部劇目。今次佢更參與兩部劇目嘅編劇，而《小玉恨．轉》更係佢首次參與導演工作。即使近日忙於排練，曉瑩都抽空喺新光戲院關燈後去現場懷緬，原來當年佢同丈夫高潤鴻嘅證婚大典，就喺戲院舉行。

謝曉瑩話《小玉恨．轉》已係「N次」創作，今次佢以嶄新角度切入李益嘅人設，保留原《霍小玉傳》嘅負心；霍小玉母親嘅背景，則為霍王侍婢，霍王死，被驅擯淪為賤籍。此劇嘅重點在於「轉」，盼轉化小玉嘅執念同咀咒，坊間過去鮮少對呢部份關注或詮譯；佢就以現代人嘅同理心，去體現古代人嘅處境，同將呢份執念解開，將這家傳戶曉、流傳千載嘅故事人物，用現代人嘅眼光重新解讀這流傳千古嘅故事。

至於《連城》係根據《聊齋》故事改編，書生喬遠山不但善良仗義，其才華更令史連城驚嘆不已，芳心暗許。又贈與銀兩，作佢讀書之資。喬生感動不已，亦對連城一往情深，更不惜為病重嘅連城割下心頭肉作藥引。不過史家就嫌喬生家貧，執意將連城許配他人，最後一對有情人先後傷心抑鬱而亡。此劇對人鬼、愛情、友情、社會階級均有深刻描述。