沈可欣入五生日無預警收驚喜勁冧 獲老公楊證樺及兩子寵愛令人羨慕

楊證樺Man Yeung 同 沈可欣Janice Shum 係圈中其中一對模範夫婦，兩人育有一對可愛兒子。12號係沈可欣嘅50歲生日，雖然兩人工作忙碌至晚上先返家，但估唔到返到屋企第一時間收到一對寶貝仔送上嘅生日驚喜，做媽媽嘅當然係勁心甜啦。

沈可欣將喜悅上載到IG分享，指自己12號晚同朋友食完飯返到屋企，開門時全屋已經熄晒燈，兩個仔突然分別喺房同埋梳化旁邊跳出嚟，攞住份禮物同佢講Happy birthday，當刻真係好意外好驚喜！

因為完全冇諗過兩個仔會咁樣做，首先佢哋搵咗屋企嘅食物自製咗一個生日蛋糕，然後又各自創作咗份生日禮物，仲包得好靚，用舊嘅電話盒放咗自己部電話入去，當係送咗部電話畀媽咪，真係創意無限！盒內仲有哥哥親手畫嘅畫、細佬畫嘅大吉大利圖，兩兄弟仲合力整咗條寶石頸鏈送畀沈可欣，仲一直開住電子琴嘅音樂襯托成件事。

呢個咁窩心嘅驚喜令媽媽沈可欣非常開心，最感動係細佬之後同佢講：「爸爸都會咁對你！」令沈可欣感動到想喊。最後佢多謝兩個寶貝仔同老公一直咁錫佢，指一家人要繼續愛下去！唔少好友留言送祝福，又羨慕沈可欣有三條仔嘅愛錫好幸福。

楊證樺同沈可欣都係TVB經典綠葉，兩人參與拍攝劇集眾多，有不同發揮嘅角色，Man近日係《痞子無間道》以及稍後播出嘅《奪命提示》中都有份演出。夫妻除咗忙演藝事對之外，亦與友人合夥涉足不同生意。