胡定欣醫生男友Akin身份曝光 任無國界醫生11年內先後8次參與救援任務

43歲視后胡定欣（Nancy）去年11月宣布脫單，今年元宵佳節就公開與男友嘅甜蜜滑雪合照，大方放閃，而定欣早前同好友聚餐亦主動tag「陳醫生」，可見二人感情非常穩定，今日周刊報道就爆出定欣男友係外科醫生陳健華（Akin），據知二人年紀相若，盛傳佢哋籌備築愛巢。

擁有6呎身高、留有鬍鬚嘅Akin於尖沙咀一間診所執業，報道指佢嘅專用車位就有兩個登記車牌 ，除咗佢「AK」字頭車牌，仲有定欣嘅「NW」字頭車牌，似係方便女友泊車用；而二人拍拖撐枱腳，定欣為保護戀愛「幼苗」，佢與男友結伴外出時，除咗喺人多嘅地方戴口罩同鴨嘴帽，仲刻意同男友Akin分開行，非常珍惜呢段感情。

翻查網上資料可見，定欣醫生男友Akin係一位無國界醫生救援人員，於11年內先後8次去到巴基斯坦、敘利亞等地參與救援任務，2023年更赴南蘇丹難民營，擔任當地唯一嘅外科醫生。

黃子華於2016年擔任無國界醫生日榮譽行動大使，曾同定欣男友Akin一齊拍攝宣傳照，子華得知對方喺前線嘅救援點滴後，激讚Akin係男性典範。

Akin當年受訪時曾透露自細立志成為無國界醫生一分子，一直默默耕耘向夢想進發，完成外科訓練後，終於喺2011年加入無國界醫生。當子華以為Akin夢想係受家人啟發，Akin解釋自己屋企係草根階層，爸爸從事地盤、裝修，媽媽甚至當過小販，父母都冇受過太多教育，自己係從唔同途徑睇到一啲國家嘅人生活環境更差，便開始思考點樣為其他人出一分力。