周星馳新戲深圳低調開拍球場踢到飛起 EXO成員張藝興被傳擔正演出

星爺周星馳前宣布開拍電影《女足》，日前喺深圳低調開拍，唔少網民捕捉到電影拍攝情況，電影講述娥媚隊結合功夫於足球參加女足亞冠盃，喺網民影嘅片段中見到一眾女足演員喺足球場上踢到飛起，唔少吊威也飛起嘅動作畫面，星爺在場親自監督畫面。

為咗呢部籌備多時嘅作品，星爺更公開招募美女演員飾演女足隊員，蔡思貝同以韓團出道嘅Elkie莊錠欣亦公開應徵。最終香港區22歲、有「甜版舒淇」之稱嘅模特兒張天一，憑住40吋長腿、亮麗外形脫穎而出，成為其中一員。而喺外國著名電影網站上演員陣容嘅列表中亦見到蔡思貝個名。

電影雖然尚未官宣演員陣容，但有傳以限定女團I.O.I出道嘅內地成員周潔瓊、90後花旦迪麗熱巴、星女郎林允同徐嬌、同埋喺古裝劇《墨雨雲間》演美女丫鬟嘅少女演員艾米亦會參演。而曾以韓國男團EXO成員出道嘅張藝興因電影《孤注一擲》嘅演出，演技備受肯定，有傳佢會擔任電影嘅男主角﹐同內地女演員張小斐共同主演電影。