江美儀透露曾跟前夫吳君祥聯絡 前老爺夏春秋生前每周入院洗腎2次

93歲資深藝人夏春秋（冬叔）上周離世，其兒子吳君祥前妻江美儀日前喺網上節目提到前老爺冬叔，坦言係君如發文先得知消息，江美儀指冬叔近年身體狀況麻麻，生前一段時間每周須入醫院洗腎2次。

江美儀一向同冬叔關係好，二人都係9月20日生日，以往會一齊慶祝，江美儀之前有同前夫吳君祥聯絡，問候冬叔近況，得知冬叔多數喺屋企休息，江美儀認為前老爺留低嘅係令人開心嘅印象，因為冬叔永遠都好開心，成日笑騎騎，再唔係就講笑話畀大家聽，江美儀會永遠記得冬叔嘅幽默、佢講嗰啲鹹濕笑話。

江美儀同吳君如胞弟吳君祥拍拖多年，2018年突然宣布已分手兩年，後嚟前老爺夏春秋踢爆兩人早喺2006年於美國西雅圖秘密註冊，二人由分手變成離婚，江美儀其後一直保持單身，而佢同吳君祥離婚後一直保持友好關係。