徐若瑄50歲生日陪兒子浪漫坐過山車 收DIY手寫卡冧爆曬幸福

徐若瑄（Vivian）喺2023年底宣布同富商李雲峰離婚，結束9年婚姻，兩人共同撫養兒子Dalton，回復單身後嘅Vivian忙於工作，早前卻公開患甲狀腺癌，更隨即接受手術並努力學習改變發聲位置及做物理治療等，3月19號Vivian係50歲生日，一向圈中人緣好嘅Vivian，當然有一班朋友陪佢慶祝，好姊妹林心如更吻賀壽星女。

Vivian噚日喺IG貼出一堆朋友為佢慶祝生日嘅合照兼收到阿仔Dalton用咗1.5小時整嘅DIY手寫卡，認真夠晒冧！Vivian笑指「不知不覺過完了第二個25」，話25+25要感謝嘅人太多，「一言難盡，我一如往常認真的生活工作著，平凡的日常就是最浪漫的事了，忙著陪小孩，也收到了很多的祝福」。

Vivian感覺時間倒數，人生仲有好多未完成嘅清單，佢許願希望能實現，「願平靜、平安、健康 願老天能給我更多的時間 祝我們永保童心 勇敢無畏」。Vivian今年生日有阿仔陪佢去兒童樂園，佢仲同阿仔坐最害怕嘅雲霄飛車（過山車），Vivian已覺得好浪漫。