王晶唔怕勾起劉嘉玲傷心事 預告由矮至高爆四大天王秘聞

導演王晶去年開設自家網上頻道，不時喺節目中大爆圈中秘聞，日前佢就喺頻道重提90年代震驚全港嘅劉嘉玲綁架案，王晶聲稱當年綁匪鎖定嘅目標人物係電眼美人李美鳳。

晶哥呢日出席國際短劇協會活動，被問及呢件事時，就即刻戴返頭盔話自己都係聽返嚟。至於問到佢怕唔怕重提事件勾起劉嘉玲唔好嘅回憶令對方唔開心？晶哥就話嘉玲經歷過咁多嘢，點會因為咁而唔開心，仲話有邊個唔知呢件事，講吓冇咩所謂。

講到嘉玲曾表示唔想重提舊事，晶哥就話咁對方唔使睇佢嘅頻道，佢又指無論講咩都會有人覺得負面，咁不如匿喺屋企咩都唔講唔做就唔會得罪人。至於問到李美鳳本人知唔知呢件事，晶哥就話自己唔知道，因為佢都係聽返嚟嘅。

除咗嘉玲姐嘅綁架風波外，晶哥仲爆埋叻哥陳百祥90年代同譚詠麟去澳洲登台時，突然喺貴賓廳被人圍毆，對此晶哥就話雖然當時自己唔係現場，但就知道呢件事，仲指當時叻哥唔係好傷。

雖然唔少網民話晶哥玩踢爆都係為增加流量，不過晶哥就一於懶理，仲預告嚟緊將爆四大天王秘聞，仲話會由矮到高講起，唔怕會得罪人。晶哥仲話頻道只係玩票性質，正職都係拍電影，對於有指今年係電影業寒冬，佢相當認同，指因為大家窮而唔敢開戲，所以只好盡做，而佢今年亦計劃開新戲。