盧國沾離世丨75歲詞聖沾Sir夢中離世 畢生創作超過三千首廣東歌詞

被封為「詞聖」嘅著名填詞人盧國沾喺19號晚傳出死訊，享年75歲。沾Sir女兒葦蓁喺社交平台證實爸爸死訊，透露爸爸喺19號早上於睡夢中與世長辭，走得安詳，希望各界給予佢哋家人空間，有關後事安排會再通知各位。

盧國沾擅長將古典文學意境融入流行曲，創作超過三千首廣東歌歌詞，喺香港流行曲詞壇同黃霑、鄭國江齊名並列三大填詞人。沾Sir自細鍾意文學，13歲起以筆名沾夢投稿《青年周報》，當年更成功考上中文大學新聞系。

沾Sir於1968年讀大學期間加入無綫電視為官方刊物《香港電視》任記者訪問台前幕後，1975年獲邀為劇集《巫山盟》歌曲作詞，而展開佢嘅填詞生涯。去過其他電視台同廣告公司任職後，沾Sir喺80年代擔任麗的電視宣傳總監時，為電視劇《天蠶變》填寫主題曲，因為佢擅長為武俠劇主題曲填詞獲得盧大俠嘅稱號。沾Sir創咗唔少經典劇集歌，包括《陸小鳳》、《小李飛刀》、《人在旅途灑淚時》、《秦始皇》、《戲劇人生》等。

沾Sir之後嘗試唔同嘅題材，包括描寫人生無常嘅《明日話今天》、《變色龍》、《每當變幻時》等，唔止歌曲傳唱度高，唔少歌曲嘅歌詞更成為經典金句，出現喺唔少影視作品當中，好似《食神》嘅莫文蔚哼出《陸小鳳》經典歌詞亦係出自沾Sir筆下。 沾Sir好感恩自己嘅歌詞成為大家嘅金句，正如「少少苦楚等於激勵」、「我總要步步向望」等。

沾Sir卓越貢獻喺2001年得到肯定，獲「香港作曲家及作詞家協會」頒發音樂成就大獎，2015年更獲「十大中文金曲」頒發最高榮譽「金針獎」。沾Sir喺40歲時因為操勞過度中風行動不便，需要太太廖劍蘭貼身照顧，開始淡出詞界。

沾Sir最後一次公開露面係2016年嘅紅館作品展演唱會，當時雲集葉振棠、張德蘭、李龍基、陳秀雯、C AllStar等老、中、青三代歌手，沾Sir亦喺台上表示無諗過相隔20幾年，再能夠喺紅館同大家見面，希望大家好好欣賞各位歌手演繹大家熟悉嘅歌曲。

曾經同沾Sir反目打官司嘅徒弟羅嘉良，亦現身演唱會演出，傳出師徒經已大和解。撈家喺台上開腔感激沾Sir只係用咗半小時，填咗一首佢嘅代表作歌曲《秦始皇》。沾Sir嘅作品影響無數後輩，當中黃偉文就話正正因為沾Sir嘅作品用詞，令佢覺得填詞人好有型，啟發佢踏上填詞人之路。