黃偉晉 彭千祐 甘莫内為旅發局拍宣傳片 探索香港不一樣怡人秘境

黃偉晉、彭千祐、泰國演員甘莫内・仁希（Eye Kamolned Ruengsri）早前受香港旅遊發展局邀請，為旅發局推廣綠色旅遊拍攝介紹「香港四隅」系列宣傳片。

偉晉不時就會嚟香港工作，而彭千祐熱愛藝術，亦經常到香港參與Art Basel展覽。呢次二人參與「南」面跳島遊宣傳片，擺脫熟悉嘅城市節奏，深入探索香港自然風光。宣傳片以台灣綜藝手法拍攝，二人除咗喺赤柱正灘泳灘划獨木舟外，更坐船到蒲台島進行尋寶任務，同蒲台石刻、靈龜上山石及僧人石打卡留念，又喺佛手岩前許願。遊覽過後，佢地就坐街渡到餐廳品嚐海鮮大餐。
 
第一次玩划獨木舟嘅彭千祐表示相當興奮，仲話自己好想衝出海：「從來沒想過香港可以這樣去玩，是非常棒的體驗！而且因為體驗了獨木舟的行程，有點愛上划獨木舟，所以回到台灣就有跟朋友分享，喜歡outdoor的朋友都沒有想過香港可以這樣去玩，很想親身體驗，就已經立刻買了機票來香港。」

而多數喺市區工作同飲飲食食嘅偉晉就表示，經過呢次拍攝先知原來香港有咁多靚嘅地方，而且係非常壯觀嘅景點，令佢大吃一驚，仲話會向五堅情嘅成員推薦添。

令偉晉同彭千祐覺得最難忘嘅景點，就當然係蒲台島嘅景色，彭千祐就話：「蒲台島回港島時剛好是傍晚，看到的夕陽是我這幾年看過最美的，因為是粉紅色的，而且吹著海風，我們在船上拍照，那個時刻讓我感受到幸福和快樂。」偉晉亦和應道：「我們感受到的那些景觀，是手機跟影片都肯定不能百分之百呈現，如果光是看到影片裡的夕陽已經很美的話，肉眼看到的震撼是機器不能代替的美麗。」

另一邊廂，泰星甘莫內．仁希向來熱愛喺社交平台分享旅行點滴，所以佢呢條「北」主題片就以Vlog手法記錄她佢喺紅花嶺郊野公園遠足嘅見聞。甘莫內參觀咗位於山咀及亞公角的二戰時期日軍機槍堡及礦山麥景陶碉堡，又走入連麻坑鉛礦洞。拍攝當日，甘莫內仲帶埋畫具，忽然興起坐喺山上畫水彩畫，以畫筆描繪紅杜鵑嘅鮮紅燦爛，放鬆心情。呢次亦係甘莫內首次喺香港登山，佢大讚紅花嶺郊野公園風景怡人，登上山頂上後，佢表示對於好似自己呢類熱愛大自然嘅人嚟講，呢度簡直係天堂。