周吉佩將赴塞班島拍自傳封面 新節目訪問中小企商家成功故事

周吉佩工作多多，唔只出碟、開個唱、搞學校，今年除咗推出新歌《GUTS》外，仲計劃推出個人自傳《第三人生》、以及開拍新節目《吉S有計》，吉吉下月更會到塞班島為新書拍攝封面照，順便寓工作於娛樂，同家人享受陽光海灘。
 
吉吉新書將細述人生三大重要階段，包括成長歲月、家庭關係，以及事業高低起跌，佢表示喺籌備過程諗起好多既痛苦又窩心嘅回憶，亦希望讀者可以從書中獲得啟發，無論遇到幾大困難，都唔好輕易放棄自己。
 
吉吉話：「我喺鐵皮屋長大，童年雖然並不富裕，但好快樂。好多人以為做明星好風光，實情有苦自己知。」而喺在家庭、事業重重壓力下，吉吉仍堅持追尋音樂夢，自爆當日冒死報名參加《中年好聲音》，差少少搞到婚變。
 
喺《中年好聲音》奪冠、重拾歌手身份後，吉吉就搞起小生意開辦音樂學校，希望透過音樂教育培養更多熱愛歌唱嘅人才，佢笑言踏足商界先發現做生意並唔容易：「終於知道做老闆唔容易，無論係營運、招生、管理都不能鬆懈。」而呢次推出新節目《吉S有計》，主要訪問唔同界別中小企商家，分享佢地嘅成功故事：「其實香港有好多小店好值得被更多人望見，希望發掘多啲有心經營嘅中小企，讓更多人認識，自己亦可從中取經。」吉吉新書同新節目預計七月推出，到時將舉行發佈會及簽名活動同粉絲見面。