馮德倫發布新figure獲好友撐場 舒淇post老公靚仔相慘被好友嘲笑

馮德倫（Stephen）近日推出原創動漫IP「BUCKET MAN」，特登揀咗喺「Complex Con Hong Kong 2025」首度發表，連日嚟Stephen落力喺社交平台宣傳，甚至不惜犧牲靚仔樣膠桶笠頭，重出江湖拍攝新版《老馮日記》叫《老馮日常》，隆重宣布同香港Figure教父Michael Lau攜手打造三款限量版Busket Man figure。

活動第一日已有唔少圈中好友去潮流展現場支持Stephen，包括同為潮人一族嘅陳冠希、容祖兒等，Edison仲好配合攞住膠桶笠頭影相，Stephen特登喺IG點名多謝幾位好友來撐場。

至於Stephen嘅嬌妻舒淇當然有幫老公宣傳啦！佢喺自己嘅IG post出一張老婆視角嘅相，相中見到Stephen正忙於佈置會場，舒淇喺post寫到「這是～～裝置藝術？行為藝術？or 變身術」。最搞笑係舒淇嘅好友台灣型男楊祐寧竟然留言「長得帥但不潮的人」，非常抵死。

其實楊祐寧唔係第一個話Stephen唔潮嘅人，事關喺《老馮日常》中，Stephen要求Michael Lau設計有佢靚樣嘅figure，就慘遭對方嘲笑：「邊個會買馮德倫嘅figure呀？你只係靚仔，又唔夠潮」，認真搞笑！