失智症布斯韋利士70歲生日 與前妻狄美摩亞溫馨共聚

銀幕硬漢形象深入民心嘅荷李活男星布斯韋利士（Bruce Willis）日前度過70歲生日，前妻狄美摩亞（Demi Moore）同現任妻子Emma攜手為佢慶祝生日，聯同兩任妻子為佢誕下嘅囡囡，前妻同現任唔單止可以共處一室，仲可以溫馨大合照，網民亦好佩服兩位女士嘅氣度。

布斯同狄美曾經有過一段13年婚姻，期間誕下三個女兒，二人喺1998年宣布離婚，離婚後二人承諾將三個女兒擺喺第一位，即管各自有新伴侶，但一直維持好朋友關係，同彼此嘅新伴侶相處融洽，不時兩個家庭齊齊聚會。

2022 年，布斯先後患上「失語症」同「失智症」，宣布告別影壇好好休養，狄美除咗經常抽時間探望陪伴前夫，又同女兒一齊組織家庭聚會，希望喺布斯生病嘅日子，帶畀佢溫暖，而布斯嘅現任妻子Emma亦非常大方，仲以好朋友形容佢同狄美嘅關係，布斯雖然患上失語症，但由佢嘅表情同笑容可以感受到佢內心一定好溫暖。