甄子丹夫婦風騷出席時尚活動 泰國男神Pond現身粉絲瘋狂

甄子丹同太太汪詩詩呢日夫妻檔現身時尚活動，兩公婆服裝襯到絕，一向硬朗嘅丹爺難得著得好花巧，丹爺話自己平時不修邊幅，為咗配合太太先會精心打扮，仲話兩公婆平時就算唔特登夾，着衫都好有默契。

唔知大家有冇發現，次次有太太喺身邊，丹爺笑容多咗，連講嘢都特別風趣，私底下喺屋企亦係一個好好先生，無論仔女有咩要求，佢都會Say yes，搞到太太要扮惡人，真係顛覆晒丹爺銀幕形象。

同場出席活動嘅仲有汪詩詩表妹湛琪清、王丹妮、內地男星常華森，以及泰國人氣男星Pond。Pond一出場，現場大批粉絲即刻陷入瘋狂，不停尖叫，而Pond亦好識做，不斷對住鏡頭擺出各種靚仔pose兼大派心心，第三次來港嘅Pond仲用廣東話同大家打招呼，氹得現場fans非常開心。

Louise呢日以一頭金髮搭配性感大露背裙，非常搶鏡，早前Louise趁老公羅孝勇返澳洲讀書前，帶埋囡囡快閃台北旅行，Louise話自己同囡囡間中都會去旅行，囡囡唔止會幫佢揀衫，而且影相仲好識得擺pose，完全遺傳阿媽嘅優良DNA。