翁靜晶發佈新書突公佈母親離世 疑尋公義被報復稱受降頭所害

一直埋頭製作香港奇案系列嘅 翁靜晶 ，除咗年前深夜嘅電台節目同後來嘅多本著作之外，近年亦開設影片頻道，繼續分享過往多宗令人咋舌嘅恐怖重案，更成為網站。近日翁靜晶再舉行新書發佈會，宣傳最新著作，亦繼澳門之後成立「香港奇案會」，同讀者觀眾深入分享。

近年對社會不公事件時有發聲，亦出力營救澳門賽馬會逾百無家貓嘅佢，出席新書發佈會時就提到，母親 趙小瑜 上月過世，享年88歲。而貓隻領養當日，更係其母嘅出殯日子。

據報道指，翁靜晶出席新書發佈會時，身邊除現任老公 何猷彪 外，尚有3名保鑣保護。翁靜晶指有人向佢發出「暗殺令」，又指出母親連續腹瀉多次之後離世，而調查團隊成員中亦多人無故肚屙，未能驗出成因，認為係「對家」出手以降頭報復。

翁靜晶指母親離世後一直未有公開，但「對家」設立嘅網站竟已即時有死訊消息，而家中亦不斷出現怪聲，聲言已搜集到唔同被「落降」嘅證據，稍後將會公開。