伍富橋老婆Shirley中伏過數疑被騙3.8萬元 誤信假廣告平價商務艙機票「優惠」

港人一有假期就會去旅行，點知騙徒卻設廣告陷阱，以網購平價機票為招徠，喺網上海量出現偽冒旅行社嘅專頁廣告，聲稱以極優惠價購買商務艙來回機票，更用買一送一等字眼吸引眼球，伍富橋老婆Shirley亦成為苦主，買咗4套假機票中伏過數，及後始知受騙，已向警方備案。

伍富橋今日喺IG分享老婆Shirley被騙經過，指老婆Shirley呢兩日不便走動，留喺屋企休養期間，見到一個訛稱賣平價國泰商務艙機票買一送一嘅廣告，Shirley不虞有詐，迅速買咗4套商務機票，更分開4次過數，每次過數$9500港元，Shirley信以為真，匯款買機票，當Shirley再想買多一套機票時，先開始發現唔對路！

伍富橋老婆Shirley經過多次盤問，該位騙徒即封鎖Shirley嘅WhatsApp，Shirley才得知自己被騙，已致電警方反詐協調中心報案，其後騙徒仍想繼續向Shirley埋手，以另一個網上旅遊服務公司再次聯絡Shirley，以平價機票優惠再度誘使Shirley「搶飛」，可見網絡詐騙非常猖獗。